Tuesday, October 9, 2007

افكار تتكلم

هلو, طبعا اني ما كنت مفكر انه رح اكتب ثاني بوست الي باللغة العربية بل حتى كنت مخطط ان يكون ثاني بوست هم بخصوص فد شي يخص حرب النجوم لكن,


الصراحة دا اريد اجرب فد طريقة بالكتابة وهي ان اكتب بدون تفكير او بالاحرى ان اطلق العنان لافكاري حتى تلكي
طريقها للكيبورد واشوف وين تصفى القضية؟؟؟!!!!!


الف رحمة على روحج ام كلثوم كلتي " فات من عمري كتير وكتير.... شفت كتير وقليل عاشقين..... الي بيشكي حالو لحالو .... والي يبكي على موالو .... اهل الحب صحيح مساكين ..... ياما الحب نده على البي ما ردش البي جواب.... ياما الشوق حاول يحايلني واقلو روح يا عذاب ...ياما عيون شاغلوني لكن ولا شغلوني..... " وما اكمل البقية لأن البقية ما صارت تنطبق علية الان والحليم بالاشارة يفهم.....!!!!!

على طاري الاغاني القديمة , كم واحد بينة لساه يسمعهن وكم واحد يتذوقهن ؟؟؟؟؟؟ الصراحة.....؟؟ مو هواية للاسف
هسة اني شاب وعمري ستة وعشرين سنة بس احب هيجي اغاني .. احسها بيها طعم غير شكل بيها فد نكهة مموجودة بمعظم الاغاني هسة.

بس شسوي مو بيدي اخلي الشباب يعوفون هيفاء وهبي ونانسي ويرجعون يسمعون صوت ام كلثوم لو فيروز لو لو لو والقائمة تطول..............

يوم الي كان الطرب صوت ينسمع و يطرب الي يسمعه مو شكل ينشاف .....!!!!

المهم,........


الاغاني القديمة مثل اغاني ام كلثوم او عبد الحليم حافظ بيها فوائد اضافية ميعرفها غير اصحابها...... من تكعد وحدك وتشغل مسجل لو سيدي مال عبد الحليم وتسمع" بتلوموني ليه" او "بحبها وبقلبي ساكن حبها" وشوية شوية تندمج وية الاغنية وتعدل كعدتك وتتكي راسك على ايدك وتبدي تسرح وتسرح ويبدي تفاعلك وية كلمات الاغنية من تفرح تفرح وياها وبدون شعور تشوف نفسك مبتسم ومن تصير حزينة تشوف نفسك تروح منك الابتسامة وعيونك تذبل وتحس بفد احباط رهيب كانه غركانة مراكبك .. لا ليش مراكبك غركانة ؟؟... خلي احجيهة.... تحس باحساس الي حبيبه/ حبيبته بعيد عنه والشوق دياكل قلبه.. ايبااااااه


لك عيني شنصير احنة العراقيين؟؟؟؟؟!!! كم دوب
رغم كل الي صار بينا بس ليهسة عدنة القدرة على ان نحب ونحلم ونتأمل خير ...!!!
الحمد لله على كل حال.


ماكو واحد بينا يحب وممجرب هذا الشي من يسمع اغنية ويحسها او خلي نكول يعيش وياها ويربطها بوضعه هو , ليش؟ لان من تحب ومتكدر تتواصل وية الي تحبه لاي سبب من الاسباب تحس بفد شعور الله لا يراويه لاحد
تحس بفد شعور هو مزيج من الضوجة والعصبية وفد حزن قاسي , وتحس بنفس الوقت بالكآبة وشايفين الغصة بالبلعوم شون تأذي؟ لو تحس بلاعيمك رح تطك من تحزن وتتأثر وهاي الحسرة الي تحسها بصدرك وبس تريد تسمع صوتها\صوته لو تشوف صورته لو تقضي دقيقة وحدة وياه .... دقيقة وحدة وبس .. هواية ؟؟؟؟ :(.

ايباااااااه.......


هنا يجي مفترق طرق بالموضوع:


اكو طريقين:


الاول: اذا انتة انسان ايمانك ضعيف وما عندك جرأة ان تبقى تمشي بطريقك وما عندك شجاعة , يعني بين قوسين حتى انتة شتريد متعرف عايش على الهامش وهذا النوع يمثل هواية هواية شباب وشابات هسة .
الثاني: اذا انتة شخص مؤمن وتعرف انه كل شي ممكن يتغير بلحظات وان الانسان ممكن يصنع مستقبله بالاتكال على الله وبالعمل مثل النحلة مهما كانت الظروف حتى يوصل للنتيجة الي يريدها وطول ما هو يمشي بطريقه ويتقدم , يبقى محتفظ بعقله بصورة عن الواقع الي يتمنى يعيشه يعني دائما صورة الشي الي يريد يكونه من يحقق حلمه او احلامه دائما ماثلة امام انظاره ويعرف شنو امكانياته وشنو يريد وميتردد ومثل ما يودا يكول “Do or do not... there is no try.”

اني مدا احاول ان انصب نفسي مصلح اجتماعي او اي شي ثاني وانما خلي نكول دا افكر بصوت عالي.....
طبعا الي يقرا هذا البوست يمكن ميشوف فد ربط بالموضوع بس اني متأكد اكو من رح يفتهمني "صنف" :)

ما اعرف شكول بعد الكهرباء طفت والشحن باقيله ساعة وشوية لما يودع وتطفى الحاسبة وبديت اقفل شوية ولو اني لعنتي انه ما اكدر انام وهاي غير قصة عود بعدين اسولفهة.

المهم, بدت تعجبني فكرة الافكار الي تحجي براحتهة ورح اسوي عنوان البوست افكار تتكلم .
ورح اسوي شغلة اخيرة , رح ادز البوست بدون ما اقراه هيجي مثل ما كتبته واشوف اذا احد يعلق عليه .......!!!!!!!!

على كولة يودا “Size matters not. Look at me. Judge me by my size, do you? Hmm? Hmm. And well you should not. For my ally is the Force, and a powerful ally it is. Life creates it, makes it grow. Its energy surrounds us and binds us. Luminous beings are we, not this crude matter. You must feel the Force around you; here, between you, me, the tree, the rock, everywhere, yes. Even between the land and the ship.”
.
.
.
نتشاوف بعدين
.
.
.
.
حجي يودا

5 comments:

Michomeme said...

مرحبا حجي يودا

حلو البوست اليوم، وصدكني هذي طريقة ناجحة بكتابة اي شي يجي على بالك ومباشرة بدون ما تتردد، بس من تكتبها راح تشوف اكو بالموضوع الواحد عدة افكار وتكدر تسوي كل وحدة منها بوست كامل وتحجي بي عن تجربتك او رايك او اي شي يخص موضوعك..

مثل اليوم انت حجيت عن الاغاني والفن الراقي، ومرة تأثر الاغاني والاشتياق، تالي ايمان الشخص واتكاله على رب العالمين..احجيلك على الاغاني.. طبعا قليل كلش الي بعدهم يستمعون لهيجي نوع من الاغاني الراقية، حتى احنة جيلنا مرات تشوفنا نستمع لاغاني هيفا او نانسي وغيرها وغيرها بس بنفس الوكت نسمع لفيروز، ام كلثوم، عادل عكلة، اسماعيل الفروجي، وهواية اغاني عراقية او عربية او اجنبية قديمة وحلوة، اما الجيل الجديد، اتفاجأت لمن اسال بنية بالاعدادية، عن اغاني عادل عكلة وشنو تحب منها، تضحك وتكول هذا منو؟؟؟
لو اسمع اغنية اهواك لعبد الحليم وتجي تكول ميشو هاي شنو الاغنية ماكو احسن منها!!
اني شخصيا اعتبر معرفة الانسان بالاغاني القديمة وعلى فتراتها شي من الثقافة لان الفن ثقافة..

ويبقى هذا رأيي الشخصي..

LionKing said...

ابدعت في انطلاق افكارك بهذي الطريقة وعجبتني الطريقة كلش واللي اتبعها اني هم مرات لان معلمتي بيها هية ميشو .. حجيت الحجي الصح والعاقل اللي يقتنع ويتذوق الكلام اللي كلتة عن الذوق مو بس بالاغاني اللي ولو كامت تعكس شي من شخصية الفرد ... طريقة خلطت بالمواضيع حلوة تشبه طريقة تفكيري بالتنقل بالافكار .. تواصل يودا وحجيك على راسي

Yoda said...

شلونكم
ميشو.....
رأيج الشخصي مرحب بي عندي وكلش عجبني ايمانج و اتزانج بالتفكير و واقعيتج .... وشكرا اختي العزيزة على زيارة المدونة مالتي ....

.................................
لايون كنك.....
اشكرك جدا على رأيك ويسلم راسك يا ورد.
وطبعا انتة انسان جدا ذوق وذواق بكل شي اعتقد مو بس بالاغاني واني اكره المجاملات.

وعلى طاري طريقة التنقل بالافكار, مرة سألو نابليون: شلون تكدر تدير المعارك الضخمة بدون اخطاء وبنفس الوقت تحل المشاكل السياسية وغيرها ؟؟؟!!!
كللهم : اني مقسم عقلي الى مجموعة ادراج(مجرات شون مجرات الكاونتر:P ) وكل مجر يخص موضوع بعينه فلما احتاج للقيادة والستراتيجية العسكرية افتح المجر مالته وهكذا.
فاعتقد انه انتة واني عدنا هيجي شي .
اشكرك جدا لان شرفت مدونتي بقلمك وتعليقك الحلو الي يعنيلي الكثير
تسلم ابو اللول (العنوان مال البلوك هيجي ..!! اني شعلية :D .

اخوكم يودا العجوز

Michomeme said...

بوست جديد
بوست جديد
بوست جديد

jisoo said...

عزيزي يودا
اني كلش تعجبني الاغاني القديمه بس اني عندي فد قناعه بهالموضوع ما اعرف ليش اني اعتبر نفسي مو من هذا الجيل اني من جيل سابق ما اعرف يمكن من المتذوقين لأغاني السبعينات الثمانينات وبداية التسعينات بحيث حتى كاظم الساهر ما اسمعله بس القديم ومرات اكول اضافه للفنانين العظام امثال ام كلثوم وعبد الحليم حافظ, المطربين اذا تلاحظ اغانيهم اول ميطلعون تكون جدا مؤثره وراهه تبدي اغانيهم تفقد بريقها ولمعانها بمرور الزمن اقصد كل ما يتقدم الزمن يكومون يطلعون اغاني بمستوى اقل . تحياتي
جيسو