Wednesday, September 30, 2009

الصديق

السلام عليكم

شونكم ..... هههههههههه .... هسة تكولون هذا شبي ؟؟؟؟!!! اشو انطللق..... كل يوم بوست... ههههههههههههه .... شنو متكيفوووون ؟؟؟؟ !!!! هعهع

المهم ... اني هسة كاعد وية صديق اعتبره من اعز اعز الاصدقاء الي عندي وهمة قليلين ...... لتخافون ... انتو همينة اصدقائي ..... وينطططبق المثل ..."" صديقي العزيز .... مكانك في القلب وليس فييي المحل""..... هههههه لا والله دا اتشاقه ... احبكم والله احبكم

اي

اني وصديقي كاعدين ودنحشش ونشرب نسكافة والهوة بارد ويبعبع .... والحاسبة مشتغلة .... حسيت اصابيعي تحكني .... هههههه ... خلي اكتب فد شي ....
شنو الفلم مدا افتهم .... معليكم تحشيش هذا .... الحاصل .....

صديقي هذا الي كاعد وياه ... عشرة عمر مثل منكول ... سنيين اصدقاء ... يومية نتعارك ونرجع نتصالح ..... وسافر ورجع وهمينة لسانه على نفس الحطة .... وعلى هلرنة طحينج ناعم مثل ميكولون .....

صديقي هذا .... نطلع سوية ونرجع سوية وناكل سوية ونشرب سوية وحتى نحشش سوية .. فوك القهر .... شكككككككد نقشب ونحجي على العالم....
مشكلته شنو ... يعصب بسرعة ... اني طبعا مفتهم فلمه من زمااااااااااان ... بس لساني اكيف واضحك من يصير عصبي على اشياء متستاهل ههههههههه ... هو ديقرة شدا اكتب هسة .....


بس شايل طيبة قلب .... ومحبة .... تكفي تعداد السكان مال الصين ....
ترة يا جماعة الخير .... صعب تلكي بهذا الوكت التعبان صديق وفي ... ترة قليل....

شكد حلو عندك واحد قريب منك تحجيله ويحجيلك وتشكيله ويشكيلك .... يشاركك همومك وافراحك ............ بابة شبيكم ..... مو مرتك عيني استاد .... صديييق صديق ليروح بالك بعيد..... المهم .... اكثر شي اكرهه هو الناس الي ينطبق عليهم المثل الي يكول :
"الصديق الذي له اوطار.... اذا قضاها طار" والحمد لله ما عندي هيجي اشخاص ضمن دائرة معارفي ...

اني رأيي بالصديق الحقيقي هو الشخص الي يضيفلك مو ينقص منك ... الي يوكفلك من تحتاج في الوقت الي تلكه نفسك بي وحيد ..... الي يحبك ويقدرك ويحترمك بدون هدف ومن دون ما يكون مفكر بمنفعة آنية او بعدين .... هذا هو الصديق الحقيقي .....
كلنا عدنا اصدقاء .... بس المشكلة كلنا عدنة بعض الاصدقاء الي بعدتهم الحياة عنا او اجبرتهم الظروف على ان يكونون بعيدين عنا بوقت من الاوقات او بشكل دائم ...

طبعا دا اكتب واني صور الاصدقاء البعيدين دتفتر براسي .... واكيد كلكم هيجي ... افكاركم راحت للناس الي تقدروهم وتحترموهم وهمة هسة بعيدين ....

هاي دعوة من عندي انه كل واحد من عدنة يجر التلفون ويخابر على صديق اله وحشة ومكانه خالي .... واذا التلفون صعب .... يدزله مسج لو ايميل اذا يعرف شون يتصل بي.......

وللي انكطعت سبل الاتصال بيهم ... خلي نتمنالهم الخير ونندعيلهم بالخير والسلامة .... لان ما دامنا نتذكرهم فاكيد همة همينة ديتذكرونه ... لان الانسان الي يترك بيك اثر طيب اكيد تكون انتة او انتي تارك بي اثر طيب بالاساس ...

حبايبي تأخر الوكت ولازم اترككم هسة ... بس لتنسون .... خلو القلوب تتواصل رغم المسافات والزمن .... ولتنسون الي ما نساكم....

تحية مني الكم

اخوكم وصديقكم يودا

Tuesday, September 29, 2009

اجمل يوم في حياتي

السلام عليكم

يابة شلونكم ان شاء الله الجميع بخير وصحة وسلامة

سامحوني سامحوني سامحوني اصدقائي وحبايبي لانه صارلي فترة ما مشارك ولا كاتب أي بوست من فترة جدا طويلة .

البارحة كان يوم ولا كل الايام .... اعتبرته اجمل واسعد يوم بحياتي ..... اليوم كان الاثنين الموافق الثامن والعشرين من ايلول من عام الفين وتسعة ... طبعا متردد اكتب شصار بالضبط بس خلي احجيلكم الموضوع بطريقة خاصة جدا مثل ما هو الموقف الي صار فد شيء جدا خاص وميتكرر ....

تعرفوني دائما اكول على نفسي يودا العجوز .... وخوش ولد وطيب وابن اوادم واحب افلام حرب النجوم .... هههههههه .... خوش تمهيد .... استفااد

البارحة يا محفوظين السلامة جان يوم جميل ولو شوية اكو تراب بس مومشكلة ..... وازدحامات مو طبيعية..... البارحة بغداد كلها كان عدها شمس وحدة .... بس اني كان عندي شمسين بسمائي ... تدرون شكد حلو من الواحد عنده فد امل عايش عليه سنوات بحرها وبردها وليلها ونهارها .... منتظر ويكول اصبر واتحمل ويا رب قدم الي بي الخير .... عايش على امل انه الامور ان شاء الله رح تتعدل الامور وانه يتقرب البعيد .... واووووف شكد بعيد جان .... والحمد لله رب العالمين ... الف الحمد لله رب العالمين .... البارحة صبر السنوات الطويلة بدة يجيب نتيجة والفضل اولا واخيرا لله وحده ..... وفوكاها كلشي صار صدفة... ويا محلاها من صدفة حلوة ..... البارحة اول خطوة بالطريق الي ان شاء الله رح يكون اجمل طريق برغم انه لازم يكون بي مصاعب وعقبات وهي هاي بهارات الحياة مثل ما اسميهة ... لان بدون شوية مرارة ما رح نكدر نعرف معنى الحلاوة والعسل .... مو ؟؟؟ اكو شخص واحد بس رح يكول كلمة " مو " اكثر من كل الناس بكوكب الارض .... ربي يحفظلي هذا الشخص ويخليه يملي علية حياتي طول العمر يا رب ..

البارحة كان اللقاء الحقيقي الاول بيني وبين اطيب واجمل واحن واقرب انسان عندي بهاي الدنيا كلها .... الانسانة الي اتمناها ..... سنين عايش على الامل وصابر .. صابر ومتحمل واكول يا رب ساعدنة ... يا رب سهل امرنا ... يا رب مكنني ويسرلي اكون عند حسن الظن .... يا رب انتة تعلم احنة نريد الخير والصح الي يرضيك ....

جانت شمس ... وجانت كمر .... وجانت ملاك .... قلب طيب وطبع طيب ولسان حلو وروح طاهرة نظيفة تحب الخير وتخاف رب العالمين ومتريد الا الي يرضيه ...

اللقاء جان مفاجيء وما محسوب ... واذا تريدون الصدك ..... اني ما جنت متوقع ابدا انه رح يكون هذا اليوم هو اليوم الي رح تبدي بي حياتي .... وان شاء الله يا رب بخير وسلامة يا رب..

من طبعي احسب حساب لكل الاحتمالات .... بس هذا اللقاء الغريب بكل شي مجنت متوقعه وحاسبله حساب ...

نسيت التعب ونسيت كل شي وحتة نسيت نفسي ..... لان لكيت نفسي ....

متتصورون شكد صعب الانسان ان يحتفظ بمشاعره لنفسه وميحجي وميكول ..... ومو يوم ويومين .... سنين طويلة .... وجان الاصعب ان يبقى محتفظ برباطة جأشه وبرود اعصابه وميبين عليه شي يفضح مشاعره بساعة اللقاء .....

صعب يبين عليك البرود وانتة بداخلك اكو بركان هائج ..... وفوكاها محاسب حسابك....... والاصعب انه تحس اكو اهتمام من الطرف الاخر بس متكدر تفسر هذا الاهتمام على هواك .... لان خوف الله والعقل الرصين يكول هيجي .... حسيت اكو فرحة وحسيت اكو اهتمام بس كان لازم احتفظ ببرود اعصابي .... لان ميصير اتسرع..

ههههههه قناع البرود لا بد منه بهيجي موقف لان ما اعرف شنو الطرف الثاني شديفكر وشنو يشعر .... بس اوووف شكد يأذي هذا القناع ....ههههههههه همزين اني شكلي يغلب عليه البرود من كثر ما شفت بهاي الدنيا ...

اكثر شي اعجبت بي هو الطبع الطيب واللباقة .... حلو من تعرف انسان او تحس نفسك تعرفه وبعدين يطلع احسن بهواية مما كنت تعتقد ..... الله شكد حلو .... من تكتشف هذا الشي رح تحس بفد شعور طاغي من الفرح الغامر بانك من حسيت في وقت من الاوقات انه هذا الانسان ممكن يكون هوة " The One For You! " .... و بعد ان التقيت بي تكتشف انه هو مو بس مثل ما تعتقد وانما تجاوز توقعاتك .... ومو بس تعرفه ... انما هو احسن بهواية مما جنت تعتقد ....

اجمل شي الموضوع انه بعد اللقاء ....الصدفة السعيدة .... طول اليوم اني فرحان و كل ما احجي وية واحد يكلي خير شبيك اليوم اكله معلييييك (( والمعنى في قلب الشاعر)) ..... وهسة حاليا لسان حالي يكول ولساه ديكول :

إن العيون التي في طرفها حَوَرٌ .......................... قتلننا ثم لم يحيين قتلانا
يَصْرَعنَ ذا اللُبِ حتى لا حراك بهِ.................. وهُنَّ اضعف خلق الله إنسانا

ايبااااااااه ده الحب كميل يا اخوانه ..... ربنا يتمم بخير ان شاء الله

يــــــــابــــــــة ..... شكد حجييت ... صارلي ساعة افتر على نقطة وحدة ... اشتعل بليسي شكد لا واضح ولا صريح هههههههههههه ....

حبايبي تمنولي الخير ..... دعواتكم الصادقة تفيدني .... انتو متعرفوني بالحقيقة ..... لكني واثق انه دعواتكم رح تكون صادقة لان تدرون من ادعيلكم ادعيلكم بظهر الغيب واتمنالكم الخير بكل شي بحياتكم...

يا ربي ساعدني انه امشي الطريق بخير وسلامة وبما يرضيك .... يا رب يكون الطرف الآخر مثلي .... ياااااا رب ..... لكم عيني اندعولي يكون هو هم عنده نفس شعوري وان يكون شافني بنفس العين الحلوة الي شفته بيها ..... ما اعرف شون رح اكدر اعرف هو شنو شعوره تجاهي ؟؟!!

حبايبي واصدقائي الاعزاء ........ اشكركم على وقتكم وامنياتكم الطيبة الي ما يزيد على طيبتها الا طيبة قلوبكم الحلوة ...

واختم كلامي بدعاء وكولو آمين


اللهم اغننا بحلالك عن حرامك وبفضلك عن من سواك ...

يا رب آمين

اشوفكم بخير .....

بالمناسبة ..... هم مثل كل مرة طفت الكهرباء وهسة الشحن قرب يخلص ههههههههههههههههه

تحية للكل

اخوكم

يـــودا العـــاشـــق










Sunday, November 23, 2008

المتزوجون والايجارات

اليوم عندي موضوع مضوجني واريد اكتب عنه، موضوع الشباب الي يريدون يتزوجون ومديلكون سكن للايجار، طبعا دا احجي بس عن الايجار لان امكانية شراء سكن او بناء سكن حاليا صارت جدا جدا ضئيلة وصعبة.

نجي للشغلة من البداية، الشاب يعجز لما يكدر يخطب ويجي يخطب وعادي كلنا نعرف هذي الايام شون الاهل طلباتهم حلوة وطبعا ما اعمم لان اكو هواية ناس لحد الان متفهمين ومقدرين للوضع العام يعني مو كلهم يثقلون كاهل الخاطب بالطلبات والشروط.
على العموم..
يجي الولد يخطب .... وتبدي قصة المتقدم والمتأخر والنيشان والمناقشات الي متخلص بين العائلة لان مثلا اهل البنية رايدين متقدم ومتأخر بالنسبة الهم قد يكون مقنع لكن بالنسبة لاهل الولد ممكن يكون هذا الرقم هواية ومرات على العكس ...المهم .... الي واكع بالنص هو الولد والبنية اذا همة يريدون بعضهم ويتمنون كلشي يخلص بسرعة حتى بفضل وتوفيق رب العالمين يبدون حياتهم ويكونون اسرة ويبدون يشقون طريقهم سوية بالحياة.....

خلي نكول الحمد لله رب العالمين والامور تسهلت واتفقوا على المتقدم والمتأخر والنيشان وسووا حفلة خطوبة وهاي همينة علّة بوحدها ..... الحاصل..... انخطبوا وهيييييييييييييييييييي وفرحانين........ لهنا حلو مو ؟؟.... حلو....لفترة... ربما .

ويروح اول اسبوع ورة الخطوبة ينقضي حلو حلو وكلش فرحانين ويجي الاسبوع الثاني والثالث واول شهر والشهر الثاني ......

هنا تبدي الاسئلة ...... الكل تسأل ها شوكت رح تتزوجون ؟؟؟ ويجي الجواب : بعد
يابة ليش بعد؟ ويجي الجواب ..... ها مو بعدنا ما لكينة سكن ..........!

وهنا تبدي رحلة البحث عن سكن .... الخطيبين ما عدهم مشكلة اول فترة لان متحمسين و واثقين انه رح يلكون فد شي .... أي شي ممكن يفيد عادي لان همة بس نفرين .. راسه وراس زوجته.... لكن يتفاجأون بالوضع.....................
ماكو شي للايجار .... لاحظوا انه اني كتبت كلمة (شي) وما كتبت بيت.... اعتقد تعرفون السبب مو ؟؟؟ لو مومو ؟ المهم .... لمن لا يدري وتلك مصيبةٌ رح اكللكم السبب.............

ماكو شي للايجار لان بالبداية يكونون مخططين ياخذون فد بيت زين ومرتب حتى يبدون حياتهم ورة فترة من ميلكون، شوية رح يتنازلون عن بعض المواصفات بالبيت ويبدون يدورون حتى لو مشتمل او ملحق... وراها من ميلكون رح يتنازلون بعد ويبدون يدورون حتى لو على شقة لو بيت طابق ثاني لو أي (شي) المهم يلكون سكن لان فترة الانتظار طولت والعائلة بدوا يسألون هواية ويحجون على شوية هِمّة وعلى لازم متصيرون باردين ولازم تتحركون وتدورون اكثر ........

على العموم اني مدا اكول انه الكل هيجي، لان اكو ناس دتلكي سكن ومرات حتى حسب ما يريدون من مواصفات لكن امكانية الحصول على هيجي شي تحولت من شي متاح للجميع عن طريق بعض البحث الى شي يعتمد على الحظ والفرص وسرعة القفز على أي شي يسنح ...... يعني لو يسمعون اكو بيت بالمريخ لازم يركضون عليه وبدون تفكير ومثل ما يكول المثل : تصرف وبعدين فكر لان يجوز يطير البيت بلحظة ..... هههههههههههههههههههه ... صدك شر البلية ما يضحك.

الله يكون بعوننا والله ..... اني صح لحد الان ما مريت بهيجي مواقف ..... لكن دا اعايشها واشوفها كل يوم وية الاصدقاء والاقارب ....

يابة اني هسة اترخص ..... بس اتمنى اشوف تعليقاتكم لان مشتاقلكم هواية وصارلي سنين مكاتب بوست جديد ... حييييييييل أي والله من العام مكتبت شي .. على العموم اني متأكد انتوا عاذريني لان الوضع مثل متعرفون ......سامحوني على التأخير وان شاء الله رح ارجع اتواصل وياكم قدر الامكان ......

يلله ، تصبحون على خير والله يحفظكم جميعا يا رب

بايزززز...................

حجي يودا الاعزب العجووووزز

Friday, December 7, 2007

الموجة الجيبية العراقية







هلو
طبعا صارلي فترة افكر ببوست جديد لكن بسبب مشاكل ومتاعب الحياة وكل الي تعرفوه فمديصير وقت حتى افكر .
المهم
قررت اكتب بوست جديد بس المشكلة هي انه ماكو موضوع يسوة واكول يسوة لان اكدر اكتب الفين سطر بمواضيع كومة بس شنو الفايدة وشنو رح استفاد اني او الي يقروه لان مثل ما تعرفون الي يكتب فد شي يكون لاسباب ومنها ان يرتاح لان مرات من الانسان يحتاج يحجي وية احد ويشكي همومه او متاعبه الخاصة او العامة فانه يرتاح ومن ميلكه احد يتكلم وياه وياخذ رأيه فيكتب لان الكتابة تنطي نفس الشعور او يكتب حتى يفيد غيره مثلا عنده علم بفد حقل من الحقول ويحب ان الناس تستفاد منه من مبدأ الي يكول "العلم الي وصل الي ما احبسه عندي واخليه يكمل طريقه لغيري لان العلم ملك للجميع مو لشخص "

وطبعا اكو فد شغلة اكيد كلكم رح تتفقون وياية بيهة وهي انه مرات نحتاج الى رأي او آراء اشخاص يكونون بعيدين عن الموضوع وحتى بعيدين عن الشخص المعني حتى نضمن ان يكون الرأي حيادي وامين.

وهسة بالذات طلع فد موضوع بعقلي رح ابدي اكتبه واشوف شنو ممكن تكون التعليقات وهمين حتى اعرف شنو ممكن احطله عنوان....؟؟!

كل العراقيين الان يعيشون وضع صعب وكلنه نعرفه ونعرف تفاصيله ومآسيه ومشاكله, بس اسأل فد شي ....
كم واحد منا يفكر بالوضع الحالي على انه وضع مُسلّم بي وانه هذا الوضع هوة نتيجة حتمية لفد شي او تصرف او اتجاه ؟!

اكيد اكو هواية ديفكرون بهيجي اتجاه لكن المشكلة شنو؟ المشكلة انه الكل ديفكرون بطريقة تقودهم الى ان يشعرون بالحزن بعد ما يفكرون شوية ويبدون يلعنون الحظ والبخت والمقادير الي وصلتنة لهذا الوضع المزري...

زين
خلي نجي نفصخ الموضوع... اولا ماكو شي بالحياة او بالكون يجي من فراغ ومن عدم , يعني, اني أؤمن بقانون عام كوني موحد وهو انه كل شي اله مسبب وهو الله سبحانه وتعالى وسبب ونتيجة
كلشي بحياتنا يسير بحسب هذا القانون وميحيد عنه......

زين لعد ليش دنشوف اشياء وامور ما كنا نتصور نشوفها او نعيشها في يوم من الايام ؟؟؟!!!!
اشياء نعرف ومتأكدين انه غير منطقية ومستحيل نحولها الى فد منطق عقلاني علمود على الاقل نقنع نفسنه بفد شي حتى نرتاح من عبء التفكير ...!!!!

المشكلة بينا احنة مو بالوضع لان الي جعل الوضع يوصل لهذي المواصيل هو تصرفاتنا واخطاءنا ليش؟؟؟؟
رب العالمين سبحانه وتعالى يقول :
بسم الله الرحمن الرحيم
"إن الله لا يغير ما بقوم حتى يغيروا ما بأنفسهم"
صدق الله العظيم

وللي ما افتهمني اقول
التغيير يجب ان يكون نابع من داخل الانسان لسبب بسيط وهو ان الانسان هو اصغر وحدة من وحدات المجتمع والدولة والوطن وبالتالي اذا من يكون حجر البناء المستعمل قوي ومتين ومحمي ضد عوامل الهدم فان البناء بكامله يكتسب هذه المواصفات

اكو ناس تشوف الوضع ما رح يرجع زين ابد ورح يصير ويصير ويصير كذا وكذا وكذا وانه هذا سوء حظنا وهذا قدرنا ولازم نعيشه ونقبل بي....!!!!! ؟؟؟؟ وبعدين...؟؟!!!! وين نريد نوصل بعد هذا الاستنتاج ؟؟؟؟

هاي هية نعيش ونكضيهة شون ماكان ونروح واحنة ما راضين عن نفسنا ولا مسوين الشي الصحيح ؟؟؟
ترة كلنا نحجي هيجي في وقت من الاوقات وننقهر ونحزن لكن وبعدين ؟؟؟

هسة وصلنا للي اريده يوصل للكل

يا جماعة ترة حياتنا مو قصيرة بحيث يلعب بيها الحظ الدور الي احنه منطيهياه , لو كان عمر الانسان اسبوع او شهر او سنة فممكن يدخل الحظ والصدفة كعامل مؤثر ولكن حياتنا نسبيا طويلة وبهاي الحالة يدخل القانون

المسبب والسبب والنتيجة

الله سبحانه يجعل الطبيب او المعالج سبب في شفاء مريض بعد ان يجعل كثير من الاشياء سبب للمرض والنتيجة هي الشفاء بعد المرض وقد تكون النتيجة هي ما يتبع الشفاء من تغيير اتجاهات او قناعات او او او
قد اكون ما انطيت هذي النقطة حقها لان هاي النقطة اذا نريد نشرحها ونحللها فرح نحتاج الى مو بوست بموقع وانما الى كنب ومجلدات ضخمة .

الحاصل
نرجع للوضع ببلدنا الحبيب
اريد اكول فد شي
اذا نرجع ونقرأ التاريخ شنشوف ؟؟؟؟؟؟؟؟؟؟
بلدنا واي بلد عنده مواصفات بلدنا وعراقته وحضارته وثرواته كان على مر التاريخ محط اطماع الكثيرين وتعرض لكثير من المآسي
والكوارث لكن شنو كانت النتيجة ؟؟؟

النتيجة انه بلدنا كان مهما ينداس ويتأذة لابد يرجع يوكف على رجله من جديد وهاي حقيقة مسلم بيهة ومحد يكدر ينكرها .
بلدنا يا حبايبي مثل طائر العنقاء يحترق ثم يرجع للحياة ويقوم من رماده القديم بازهى الصور واجملها واحلاها
وهذا الكلام مو من عندي ولا مجرد امال شخص ما عنده شي يكدر عليه سوى ان يتمنى على الله الاماني .... لا والله

هذا الكلام من شخص شرب التاريخ منذ ان كان يحبي على الكاع وعرف يوم على يوم ان ارضنا وبلدنا وشعبنا ولو مو كل الشعب لكن احنا لازم يرد النة يوم.
رح يجي يوم وتكولون صدك كال فلان اذا عايش او ميت الله يرحمنا جميعا
تعرفون ليش؟؟؟؟
هذا قدرنا
احنا العراقيين قدرنا ندخل مواقف صعبة طول عمر الزمن ونطلع منها ونتعلم منها وغيرنا هم يتعلم
مواصفاتنا فريدة من نوعها وما في بلد في العالم يمتلك مثلها مع احترامي للثقافات والبلدان الي احترمها جدا واحبها واقدرها مثل الحضارة الصينية واليابانية

احجيلكم فد قصة او شي يتكرر دائما جان وياية
قبل كنت امارس فنون القتال ودخلت بطولات محلية ودولية
من كنا نروح لبطولة او اختبار دولي كان اللاعب العراقي يخافون منه مو لانه عنده اسلحة دمار شامل او او او ... لا

انما الشي المعروف عن الانسان العراقي انه جسر وشجاع ولو يوكع الف مرة يرجع يكوم على حيله ويقاتل الى ان ينتصر .
اني من الناس عانيت من اصابة ادت في ما بعد الى شلل نصفي لكن بوقت النزال رديت كمت على حيلي وطلعت الخصم بضربة قاضية وفقدت الوعي وراها .... يمكن اكو شخص يضحك ويكول هذا شبي ؟؟؟!!! مخبل؟؟؟؟؟

اكله لا مو مخبل وانما هذي الروح الي عدنا احنة العراقيين , الروح الي تخلي الانسان يضحي بكل شي حتى بلده وارضه لا تنهان وهذا الي جان بعقلي من وكفت من جديد وكملت النزال..

تخيلوا .... هذا شخص واحد كدر يسوي هيجي ..!!!! فما بالكم بشعب كله عنده هذي الروح شنو ممكن يكدر يسوي ؟؟؟؟؟؟؟
بشرط
اكو استعداد لهذا الوقوف واكو تصور عن بلدنا بعد ما يرجع لطبيعته شون رح يكون ....... وكلنا ايد بايد لما نوصل
تعرف كلامي ممكن قسم من الي يقروه يكولون علية دا اعيش بالاحلام بس اجاوبهم بكلمات
اني اعرف شعبي زين واعرف شنو يكدرون يسوون .

صدكوني ذولة الناس الي اني اسميهم خلايا سرطانية يجي يوم وينهزمون او يختفون لان الشعب تعب

شعبنا تعب من هذا الوضع وبدة يفكر ..... وشنو بعدين ؟؟؟؟؟؟

وين نريد نوصل ؟؟؟؟ نريد حرب مثل حرب لبنان لا تبقي ولا تذر ؟؟؟؟

يا حبايب احنة قادة العالم
احنة الي علمنا البشرية الكتابة والموسيقى والعجلة والزراعة والموسيقى والفلك والرياضيات و و و و و وتدرون مدا اكمل لان مو ما عندي شي اكتبه انما المجال يضيق بكل الي قدمناه للبشرية لان ما نكدر نضمه بين صفحات موقع او كتاب ................

اني مهندس والمهندس دائما يحب يربط البيئة والواقع بالي درسه من علم

اني اكول الدنيا مثل الموجة الجيبية بيهة قمة وقعر وتبقى طول ما هي موجودة يوم فوك ويوم جوة وماكو استقرار على وضع لازم يوم فوك ويوم جوة
واذا تلاحظون فان الوضع عدنا مثل الموجة الجيبية بدة بفد مستوى وبعدين تصاعد الى ان وصل للقمة بحيث ماكو شي ممكن يصير اسوأ لكن شنو ؟؟؟ بدة يتنازل شوية شوية الى ان يرجع لنفس المستوى القديم ورح تشوفون وكولوا اخونا كال ..


وهذي هي الموجة الجيبية للي ميعرف شكلها








الكلام والحديث ذو شجون مثل ما يكولون بس الكهرباء انطفت وهم مبقة شحن ..... اهووووو.... ههههههه يلله



عادي هم يجي وقت تتحسن الكهرباء والله يخلي العشر امبيرات ههههههههههه

ما اعرف ليش اني كل ما اكتب بوست تطفى الكهرباء علية .........؟؟؟؟؟؟؟!
على العموم هسة يلله لكيت عنوان للبوست ورح اعنونه :
واريد آرائكم الحلوة

الموجة الجيبية العراقية

وتجيكم السالفة

نراكم .......

Tuesday, October 9, 2007

افكار تتكلم

هلو, طبعا اني ما كنت مفكر انه رح اكتب ثاني بوست الي باللغة العربية بل حتى كنت مخطط ان يكون ثاني بوست هم بخصوص فد شي يخص حرب النجوم لكن,


الصراحة دا اريد اجرب فد طريقة بالكتابة وهي ان اكتب بدون تفكير او بالاحرى ان اطلق العنان لافكاري حتى تلكي
طريقها للكيبورد واشوف وين تصفى القضية؟؟؟!!!!!


الف رحمة على روحج ام كلثوم كلتي " فات من عمري كتير وكتير.... شفت كتير وقليل عاشقين..... الي بيشكي حالو لحالو .... والي يبكي على موالو .... اهل الحب صحيح مساكين ..... ياما الحب نده على البي ما ردش البي جواب.... ياما الشوق حاول يحايلني واقلو روح يا عذاب ...ياما عيون شاغلوني لكن ولا شغلوني..... " وما اكمل البقية لأن البقية ما صارت تنطبق علية الان والحليم بالاشارة يفهم.....!!!!!

على طاري الاغاني القديمة , كم واحد بينة لساه يسمعهن وكم واحد يتذوقهن ؟؟؟؟؟؟ الصراحة.....؟؟ مو هواية للاسف
هسة اني شاب وعمري ستة وعشرين سنة بس احب هيجي اغاني .. احسها بيها طعم غير شكل بيها فد نكهة مموجودة بمعظم الاغاني هسة.

بس شسوي مو بيدي اخلي الشباب يعوفون هيفاء وهبي ونانسي ويرجعون يسمعون صوت ام كلثوم لو فيروز لو لو لو والقائمة تطول..............

يوم الي كان الطرب صوت ينسمع و يطرب الي يسمعه مو شكل ينشاف .....!!!!

المهم,........


الاغاني القديمة مثل اغاني ام كلثوم او عبد الحليم حافظ بيها فوائد اضافية ميعرفها غير اصحابها...... من تكعد وحدك وتشغل مسجل لو سيدي مال عبد الحليم وتسمع" بتلوموني ليه" او "بحبها وبقلبي ساكن حبها" وشوية شوية تندمج وية الاغنية وتعدل كعدتك وتتكي راسك على ايدك وتبدي تسرح وتسرح ويبدي تفاعلك وية كلمات الاغنية من تفرح تفرح وياها وبدون شعور تشوف نفسك مبتسم ومن تصير حزينة تشوف نفسك تروح منك الابتسامة وعيونك تذبل وتحس بفد احباط رهيب كانه غركانة مراكبك .. لا ليش مراكبك غركانة ؟؟... خلي احجيهة.... تحس باحساس الي حبيبه/ حبيبته بعيد عنه والشوق دياكل قلبه.. ايبااااااه


لك عيني شنصير احنة العراقيين؟؟؟؟؟!!! كم دوب
رغم كل الي صار بينا بس ليهسة عدنة القدرة على ان نحب ونحلم ونتأمل خير ...!!!
الحمد لله على كل حال.


ماكو واحد بينا يحب وممجرب هذا الشي من يسمع اغنية ويحسها او خلي نكول يعيش وياها ويربطها بوضعه هو , ليش؟ لان من تحب ومتكدر تتواصل وية الي تحبه لاي سبب من الاسباب تحس بفد شعور الله لا يراويه لاحد
تحس بفد شعور هو مزيج من الضوجة والعصبية وفد حزن قاسي , وتحس بنفس الوقت بالكآبة وشايفين الغصة بالبلعوم شون تأذي؟ لو تحس بلاعيمك رح تطك من تحزن وتتأثر وهاي الحسرة الي تحسها بصدرك وبس تريد تسمع صوتها\صوته لو تشوف صورته لو تقضي دقيقة وحدة وياه .... دقيقة وحدة وبس .. هواية ؟؟؟؟ :(.

ايباااااااه.......


هنا يجي مفترق طرق بالموضوع:


اكو طريقين:


الاول: اذا انتة انسان ايمانك ضعيف وما عندك جرأة ان تبقى تمشي بطريقك وما عندك شجاعة , يعني بين قوسين حتى انتة شتريد متعرف عايش على الهامش وهذا النوع يمثل هواية هواية شباب وشابات هسة .
الثاني: اذا انتة شخص مؤمن وتعرف انه كل شي ممكن يتغير بلحظات وان الانسان ممكن يصنع مستقبله بالاتكال على الله وبالعمل مثل النحلة مهما كانت الظروف حتى يوصل للنتيجة الي يريدها وطول ما هو يمشي بطريقه ويتقدم , يبقى محتفظ بعقله بصورة عن الواقع الي يتمنى يعيشه يعني دائما صورة الشي الي يريد يكونه من يحقق حلمه او احلامه دائما ماثلة امام انظاره ويعرف شنو امكانياته وشنو يريد وميتردد ومثل ما يودا يكول “Do or do not... there is no try.”

اني مدا احاول ان انصب نفسي مصلح اجتماعي او اي شي ثاني وانما خلي نكول دا افكر بصوت عالي.....
طبعا الي يقرا هذا البوست يمكن ميشوف فد ربط بالموضوع بس اني متأكد اكو من رح يفتهمني "صنف" :)

ما اعرف شكول بعد الكهرباء طفت والشحن باقيله ساعة وشوية لما يودع وتطفى الحاسبة وبديت اقفل شوية ولو اني لعنتي انه ما اكدر انام وهاي غير قصة عود بعدين اسولفهة.

المهم, بدت تعجبني فكرة الافكار الي تحجي براحتهة ورح اسوي عنوان البوست افكار تتكلم .
ورح اسوي شغلة اخيرة , رح ادز البوست بدون ما اقراه هيجي مثل ما كتبته واشوف اذا احد يعلق عليه .......!!!!!!!!

على كولة يودا “Size matters not. Look at me. Judge me by my size, do you? Hmm? Hmm. And well you should not. For my ally is the Force, and a powerful ally it is. Life creates it, makes it grow. Its energy surrounds us and binds us. Luminous beings are we, not this crude matter. You must feel the Force around you; here, between you, me, the tree, the rock, everywhere, yes. Even between the land and the ship.”
.
.
.
نتشاوف بعدين
.
.
.
.
حجي يودا

Thursday, January 11, 2007

The first post


Hello everyone, some might wonder about the odd name of my blog, well, It is YODA(the old Jedi-master from the good old StarWars films)
And for those who would like to know more about the nine hundred years old Jedi-master here is a link for his biography http://www.starwars.com/databank/character/yoda/index.html

Now, lets start talking about myself, I am a simple youngman from IRAQ aged 27, single, B.Sc in Engineering.
My interests are in electronics, computers, network technology, internet, sports(Martial Arts), and collecting anything about StarWars.
I have learned about this site from a friend of mine, and to be honest, I liked the idea so much that I have made the decision of starting my own blog.
Well, that’s all for now.

I'll be back...
Yoda