الموجة الجيبية العراقية

هلو
طبعا صارلي فترة افكر ببوست جديد لكن بسبب مشاكل ومتاعب الحياة وكل الي تعرفوه فمديصير وقت حتى افكر .
المهم
قررت اكتب بوست جديد بس المشكلة هي انه ماكو موضوع يسوة واكول يسوة لان اكدر اكتب الفين سطر بمواضيع كومة بس شنو الفايدة وشنو رح استفاد اني او الي يقروه لان مثل ما تعرفون الي يكتب فد شي يكون لاسباب ومنها ان يرتاح لان مرات من الانسان يحتاج يحجي وية احد ويشكي همومه او متاعبه الخاصة او العامة فانه يرتاح ومن ميلكه احد يتكلم وياه وياخذ رأيه فيكتب لان الكتابة تنطي نفس الشعور او يكتب حتى يفيد غيره مثلا عنده علم بفد حقل من الحقول ويحب ان الناس تستفاد منه من مبدأ الي يكول "العلم الي وصل الي ما احبسه عندي واخليه يكمل طريقه لغيري لان العلم ملك للجميع مو لشخص "

وطبعا اكو فد شغلة اكيد كلكم رح تتفقون وياية بيهة وهي انه مرات نحتاج الى رأي او آراء اشخاص يكونون بعيدين عن الموضوع وحتى بعيدين عن الشخص المعني حتى نضمن ان يكون الرأي حيادي وامين.

وهسة بالذات طلع فد موضوع بعقلي رح ابدي اكتبه واشوف شنو ممكن تكون التعليقات وهمين حتى اعرف شنو ممكن احطله عنوان....؟؟!

كل العراقيين الان يعيشون وضع صعب وكلنه نعرفه ونعرف تفاصيله ومآسيه ومشاكله, بس اسأل فد شي ....
كم واحد منا يفكر بالوضع الحالي على انه وضع مُسلّم بي وانه هذا الوضع هوة نتيجة حتمية لفد شي او تصرف او اتجاه ؟!

اكيد اكو هواية ديفكرون بهيجي اتجاه لكن المشكلة شنو؟ المشكلة انه الكل ديفكرون بطريقة تقودهم الى ان يشعرون بالحزن بعد ما يفكرون شوية ويبدون يلعنون الحظ والبخت والمقادير الي وصلتنة لهذا الوضع المزري...

زين
خلي نجي نفصخ الموضوع... اولا ماكو شي بالحياة او بالكون يجي من فراغ ومن عدم , يعني, اني أؤمن بقانون عام كوني موحد وهو انه كل شي اله مسبب وهو الله سبحانه وتعالى وسبب ونتيجة
كلشي بحياتنا يسير بحسب هذا القانون وميحيد عنه......

زين لعد ليش دنشوف اشياء وامور ما كنا نتصور نشوفها او نعيشها في يوم من الايام ؟؟؟!!!!
اشياء نعرف ومتأكدين انه غير منطقية ومستحيل نحولها الى فد منطق عقلاني علمود على الاقل نقنع نفسنه بفد شي حتى نرتاح من عبء التفكير ...!!!!

المشكلة بينا احنة مو بالوضع لان الي جعل الوضع يوصل لهذي المواصيل هو تصرفاتنا واخطاءنا ليش؟؟؟؟
رب العالمين سبحانه وتعالى يقول :
بسم الله الرحمن الرحيم
"إن الله لا يغير ما بقوم حتى يغيروا ما بأنفسهم"
صدق الله العظيم

وللي ما افتهمني اقول
التغيير يجب ان يكون نابع من داخل الانسان لسبب بسيط وهو ان الانسان هو اصغر وحدة من وحدات المجتمع والدولة والوطن وبالتالي اذا من يكون حجر البناء المستعمل قوي ومتين ومحمي ضد عوامل الهدم فان البناء بكامله يكتسب هذه المواصفات

اكو ناس تشوف الوضع ما رح يرجع زين ابد ورح يصير ويصير ويصير كذا وكذا وكذا وانه هذا سوء حظنا وهذا قدرنا ولازم نعيشه ونقبل بي....!!!!! ؟؟؟؟ وبعدين...؟؟!!!! وين نريد نوصل بعد هذا الاستنتاج ؟؟؟؟

هاي هية نعيش ونكضيهة شون ماكان ونروح واحنة ما راضين عن نفسنا ولا مسوين الشي الصحيح ؟؟؟
ترة كلنا نحجي هيجي في وقت من الاوقات وننقهر ونحزن لكن وبعدين ؟؟؟

هسة وصلنا للي اريده يوصل للكل

يا جماعة ترة حياتنا مو قصيرة بحيث يلعب بيها الحظ الدور الي احنه منطيهياه , لو كان عمر الانسان اسبوع او شهر او سنة فممكن يدخل الحظ والصدفة كعامل مؤثر ولكن حياتنا نسبيا طويلة وبهاي الحالة يدخل القانون

المسبب والسبب والنتيجة

الله سبحانه يجعل الطبيب او المعالج سبب في شفاء مريض بعد ان يجعل كثير من الاشياء سبب للمرض والنتيجة هي الشفاء بعد المرض وقد تكون النتيجة هي ما يتبع الشفاء من تغيير اتجاهات او قناعات او او او
قد اكون ما انطيت هذي النقطة حقها لان هاي النقطة اذا نريد نشرحها ونحللها فرح نحتاج الى مو بوست بموقع وانما الى كنب ومجلدات ضخمة .

الحاصل
نرجع للوضع ببلدنا الحبيب
اريد اكول فد شي
اذا نرجع ونقرأ التاريخ شنشوف ؟؟؟؟؟؟؟؟؟؟
بلدنا واي بلد عنده مواصفات بلدنا وعراقته وحضارته وثرواته كان على مر التاريخ محط اطماع الكثيرين وتعرض لكثير من المآسي

والكوارث لكن شنو كانت النتيجة ؟؟؟

النتيجة انه بلدنا كان مهما ينداس ويتأذة لابد يرجع يوكف على رجله من جديد وهاي حقيقة مسلم بيهة ومحد يكدر ينكرها .
بلدنا يا حبايبي مثل طائر العنقاء يحترق ثم يرجع للحياة ويقوم من رماده القديم بازهى الصور واجملها واحلاها
وهذا الكلام مو من عندي ولا مجرد امال شخص ما عنده شي يكدر عليه سوى ان يتمنى على الله الاماني .... لا والله

هذا الكلام من شخص شرب التاريخ منذ ان كان يحبي على الكاع وعرف يوم على يوم ان ارضنا وبلدنا وشعبنا ولو مو كل الشعب لكن احنا لازم يرد النة يوم.
رح يجي يوم وتكولون صدك كال فلان اذا عايش او ميت الله يرحمنا جميعا
تعرفون ليش؟؟؟؟
هذا قدرنا
احنا العراقيين قدرنا ندخل مواقف صعبة طول عمر الزمن ونطلع منها ونتعلم منها وغيرنا هم يتعلم
مواصفاتنا فريدة من نوعها وما في بلد في العالم يمتلك مثلها مع احترامي للثقافات والبلدان الي احترمها جدا واحبها واقدرها مثل الحضارة الصينية واليابانية

احجيلكم فد قصة او شي يتكرر دائما جان وياية
قبل كنت امارس فنون القتال ودخلت بطولات محلية ودولية
من كنا نروح لبطولة او اختبار دولي كان اللاعب العراقي يخافون منه مو لانه عنده اسلحة دمار شامل او او او ... لا

انما الشي المعروف عن الانسان العراقي انه جسر وشجاع ولو يوكع الف مرة يرجع يكوم على حيله ويقاتل الى ان ينتصر .
اني من الناس عانيت من اصابة ادت في ما بعد الى شلل نصفي لكن بوقت النزال رديت كمت على حيلي وطلعت الخصم بضربة قاضية وفقدت الوعي وراها .... يمكن اكو شخص يضحك ويكول هذا شبي ؟؟؟!!! مخبل؟؟؟؟؟

اكله لا مو مخبل وانما هذي الروح الي عدنا احنة العراقيين , الروح الي تخلي الانسان يضحي بكل شي حتى بلده وارضه لا تنهان وهذا الي جان بعقلي من وكفت من جديد وكملت النزال..

تخيلوا .... هذا شخص واحد كدر يسوي هيجي ..!!!! فما بالكم بشعب كله عنده هذي الروح شنو ممكن يكدر يسوي ؟؟؟؟؟؟؟
بشرط
اكو استعداد لهذا الوقوف واكو تصور عن بلدنا بعد ما يرجع لطبيعته شون رح يكون ....... وكلنا ايد بايد لما نوصل
تعرف كلامي ممكن قسم من الي يقروه يكولون علية دا اعيش بالاحلام بس اجاوبهم بكلمات
اني اعرف شعبي زين واعرف شنو يكدرون يسوون .

صدكوني ذولة الناس الي اني اسميهم خلايا سرطانية يجي يوم وينهزمون او يختفون لان الشعب تعب

شعبنا تعب من هذا الوضع وبدة يفكر ..... وشنو بعدين ؟؟؟؟؟؟

وين نريد نوصل ؟؟؟؟ نريد حرب مثل حرب لبنان لا تبقي ولا تذر ؟؟؟؟

يا حبايب احنة قادة العالم
احنة الي علمنا البشرية الكتابة والموسيقى والعجلة والزراعة والموسيقى والفلك والرياضيات و و و و و وتدرون مدا اكمل لان مو ما عندي شي اكتبه انما المجال يضيق بكل الي قدمناه للبشرية لان ما نكدر نضمه بين صفحات موقع او كتاب ................

اني مهندس والمهندس دائما يحب يربط البيئة والواقع بالي درسه من علم

اني اكول الدنيا مثل الموجة الجيبية بيهة قمة وقعر وتبقى طول ما هي موجودة يوم فوك ويوم جوة وماكو استقرار على وضع لازم يوم فوك ويوم جوة
واذا تلاحظون فان الوضع عدنا مثل الموجة الجيبية بدة بفد مستوى وبعدين تصاعد الى ان وصل للقمة بحيث ماكو شي ممكن يصير اسوأ لكن شنو ؟؟؟ بدة يتنازل شوية شوية الى ان يرجع لنفس المستوى القديم ورح تشوفون وكولوا اخونا كال ..

وهذي هي الموجة الجيبية للي ميعرف شكلها

الكلام والحديث ذو شجون مثل ما يكولون بس الكهرباء انطفت وهم مبقة شحن ..... اهووووو.... ههههههه يلله

عادي هم يجي وقت تتحسن الكهرباء والله يخلي العشر امبيرات ههههههههههه

ما اعرف ليش اني كل ما اكتب بوست تطفى الكهرباء علية .........؟؟؟؟؟؟؟!
على العموم هسة يلله لكيت عنوان للبوست ورح اعنونه :
واريد آرائكم الحلوة

الموجة الجيبية العراقية

وتجيكم السالفة

نراكم .......