Tuesday, September 29, 2009

اجمل يوم في حياتي

السلام عليكم

يابة شلونكم ان شاء الله الجميع بخير وصحة وسلامة

سامحوني سامحوني سامحوني اصدقائي وحبايبي لانه صارلي فترة ما مشارك ولا كاتب أي بوست من فترة جدا طويلة .

البارحة كان يوم ولا كل الايام .... اعتبرته اجمل واسعد يوم بحياتي ..... اليوم كان الاثنين الموافق الثامن والعشرين من ايلول من عام الفين وتسعة ... طبعا متردد اكتب شصار بالضبط بس خلي احجيلكم الموضوع بطريقة خاصة جدا مثل ما هو الموقف الي صار فد شيء جدا خاص وميتكرر ....

تعرفوني دائما اكول على نفسي يودا العجوز .... وخوش ولد وطيب وابن اوادم واحب افلام حرب النجوم .... هههههههه .... خوش تمهيد .... استفااد

البارحة يا محفوظين السلامة جان يوم جميل ولو شوية اكو تراب بس مومشكلة ..... وازدحامات مو طبيعية..... البارحة بغداد كلها كان عدها شمس وحدة .... بس اني كان عندي شمسين بسمائي ... تدرون شكد حلو من الواحد عنده فد امل عايش عليه سنوات بحرها وبردها وليلها ونهارها .... منتظر ويكول اصبر واتحمل ويا رب قدم الي بي الخير .... عايش على امل انه الامور ان شاء الله رح تتعدل الامور وانه يتقرب البعيد .... واووووف شكد بعيد جان .... والحمد لله رب العالمين ... الف الحمد لله رب العالمين .... البارحة صبر السنوات الطويلة بدة يجيب نتيجة والفضل اولا واخيرا لله وحده ..... وفوكاها كلشي صار صدفة... ويا محلاها من صدفة حلوة ..... البارحة اول خطوة بالطريق الي ان شاء الله رح يكون اجمل طريق برغم انه لازم يكون بي مصاعب وعقبات وهي هاي بهارات الحياة مثل ما اسميهة ... لان بدون شوية مرارة ما رح نكدر نعرف معنى الحلاوة والعسل .... مو ؟؟؟ اكو شخص واحد بس رح يكول كلمة " مو " اكثر من كل الناس بكوكب الارض .... ربي يحفظلي هذا الشخص ويخليه يملي علية حياتي طول العمر يا رب ..

البارحة كان اللقاء الحقيقي الاول بيني وبين اطيب واجمل واحن واقرب انسان عندي بهاي الدنيا كلها .... الانسانة الي اتمناها ..... سنين عايش على الامل وصابر .. صابر ومتحمل واكول يا رب ساعدنة ... يا رب سهل امرنا ... يا رب مكنني ويسرلي اكون عند حسن الظن .... يا رب انتة تعلم احنة نريد الخير والصح الي يرضيك ....

جانت شمس ... وجانت كمر .... وجانت ملاك .... قلب طيب وطبع طيب ولسان حلو وروح طاهرة نظيفة تحب الخير وتخاف رب العالمين ومتريد الا الي يرضيه ...

اللقاء جان مفاجيء وما محسوب ... واذا تريدون الصدك ..... اني ما جنت متوقع ابدا انه رح يكون هذا اليوم هو اليوم الي رح تبدي بي حياتي .... وان شاء الله يا رب بخير وسلامة يا رب..

من طبعي احسب حساب لكل الاحتمالات .... بس هذا اللقاء الغريب بكل شي مجنت متوقعه وحاسبله حساب ...

نسيت التعب ونسيت كل شي وحتة نسيت نفسي ..... لان لكيت نفسي ....

متتصورون شكد صعب الانسان ان يحتفظ بمشاعره لنفسه وميحجي وميكول ..... ومو يوم ويومين .... سنين طويلة .... وجان الاصعب ان يبقى محتفظ برباطة جأشه وبرود اعصابه وميبين عليه شي يفضح مشاعره بساعة اللقاء .....

صعب يبين عليك البرود وانتة بداخلك اكو بركان هائج ..... وفوكاها محاسب حسابك....... والاصعب انه تحس اكو اهتمام من الطرف الاخر بس متكدر تفسر هذا الاهتمام على هواك .... لان خوف الله والعقل الرصين يكول هيجي .... حسيت اكو فرحة وحسيت اكو اهتمام بس كان لازم احتفظ ببرود اعصابي .... لان ميصير اتسرع..

ههههههه قناع البرود لا بد منه بهيجي موقف لان ما اعرف شنو الطرف الثاني شديفكر وشنو يشعر .... بس اوووف شكد يأذي هذا القناع ....ههههههههه همزين اني شكلي يغلب عليه البرود من كثر ما شفت بهاي الدنيا ...

اكثر شي اعجبت بي هو الطبع الطيب واللباقة .... حلو من تعرف انسان او تحس نفسك تعرفه وبعدين يطلع احسن بهواية مما كنت تعتقد ..... الله شكد حلو .... من تكتشف هذا الشي رح تحس بفد شعور طاغي من الفرح الغامر بانك من حسيت في وقت من الاوقات انه هذا الانسان ممكن يكون هوة " The One For You! " .... و بعد ان التقيت بي تكتشف انه هو مو بس مثل ما تعتقد وانما تجاوز توقعاتك .... ومو بس تعرفه ... انما هو احسن بهواية مما جنت تعتقد ....

اجمل شي الموضوع انه بعد اللقاء ....الصدفة السعيدة .... طول اليوم اني فرحان و كل ما احجي وية واحد يكلي خير شبيك اليوم اكله معلييييك (( والمعنى في قلب الشاعر)) ..... وهسة حاليا لسان حالي يكول ولساه ديكول :

إن العيون التي في طرفها حَوَرٌ .......................... قتلننا ثم لم يحيين قتلانا
يَصْرَعنَ ذا اللُبِ حتى لا حراك بهِ.................. وهُنَّ اضعف خلق الله إنسانا

ايبااااااااه ده الحب كميل يا اخوانه ..... ربنا يتمم بخير ان شاء الله

يــــــــابــــــــة ..... شكد حجييت ... صارلي ساعة افتر على نقطة وحدة ... اشتعل بليسي شكد لا واضح ولا صريح هههههههههههه ....

حبايبي تمنولي الخير ..... دعواتكم الصادقة تفيدني .... انتو متعرفوني بالحقيقة ..... لكني واثق انه دعواتكم رح تكون صادقة لان تدرون من ادعيلكم ادعيلكم بظهر الغيب واتمنالكم الخير بكل شي بحياتكم...

يا ربي ساعدني انه امشي الطريق بخير وسلامة وبما يرضيك .... يا رب يكون الطرف الآخر مثلي .... ياااااا رب ..... لكم عيني اندعولي يكون هو هم عنده نفس شعوري وان يكون شافني بنفس العين الحلوة الي شفته بيها ..... ما اعرف شون رح اكدر اعرف هو شنو شعوره تجاهي ؟؟!!

حبايبي واصدقائي الاعزاء ........ اشكركم على وقتكم وامنياتكم الطيبة الي ما يزيد على طيبتها الا طيبة قلوبكم الحلوة ...

واختم كلامي بدعاء وكولو آمين


اللهم اغننا بحلالك عن حرامك وبفضلك عن من سواك ...

يا رب آمين

اشوفكم بخير .....

بالمناسبة ..... هم مثل كل مرة طفت الكهرباء وهسة الشحن قرب يخلص ههههههههههههههههه

تحية للكل

اخوكم

يـــودا العـــاشـــق










2 comments:

Michomeme said...

يودا العاشق
و اخيرا راح يودا العجوز اجانة يودا العاشق، كلامك و احساسك الصادق رجعني للبلوك مال لايون كنك، نفس الاحساس و نفس صدق المشاعر.
الحب حلو، خاصة لمن يكون الانسان فاني نفسه لانسان ثاني، سعادتنا بالدنيا هي لمن نخلي انسان ثاني سعيد، لمن نحس اكو انسان بالدنيا مالي علينا حياتنا و مخلي كلشي حلو و وردي بعيوننا، انسان حتى لو ما حاس بيك او ما متأكد من مشاعره، يكفي لمن تمر بوقت ضيق او تعب تغمض عيونك تجي صورته ببالك و تنسى كل الهم الي جان بكلبك..
اخونا يودا، فرحتي الك مثل فرحة اخت بأخوها، ما ادري ليش اني و لايون كنك نحس متواصلين وياك و نتطلع لاخبارك..اتمنالك كل الموفقية، كل السعادة و كل الهناء ياربي، من كلامك مبين صدقك و العفوية الي انت بيها. خلي شي ببالك دائما، مدام انت ماشي بالطريق الصحيح، فما يصير الا الصحيح..اتمنى اسمع عنك اخبار حلوة..قريبا...و اتصور راح تحير بعدين بالايجار ههههههههههههه

الله يوفقك يارب

Yoda said...

هلو اختي ميشو ... شلونج ....وشون اخوية لايون كنك.... ان شاء الله مرتاحين

اي والله .... تالي عمري اصير عاشق ....والله وكت.... ههههههه

الكلام الي تفضلتي بي حلو .... واضيف انه يوم على يوم يصير هو الانسان الي نفكر ونحس ونفرح ونحزن من خلاله وعن طريقه .....

صدكيني الله يعلم انتي واخوية لايون كنك همينة احس متواصل وياكم واترقب اخباركم ..... من ايام النضال السلبي ههههههههه ...

اني صبرت هواية ... الوضع ما كان يسمح حتى افكر بالموضوع ... ارجع واكول ... كلشي بوكته حلو ... والاعتماد على رب العالمين .. ما عدنة غيره ....اكيد رح يكون اكو بوستات بعد .... ان شاء الله ...

شكرا

اخوج يودا