Sunday, November 23, 2008

المتزوجون والايجارات

اليوم عندي موضوع مضوجني واريد اكتب عنه، موضوع الشباب الي يريدون يتزوجون ومديلكون سكن للايجار، طبعا دا احجي بس عن الايجار لان امكانية شراء سكن او بناء سكن حاليا صارت جدا جدا ضئيلة وصعبة.

نجي للشغلة من البداية، الشاب يعجز لما يكدر يخطب ويجي يخطب وعادي كلنا نعرف هذي الايام شون الاهل طلباتهم حلوة وطبعا ما اعمم لان اكو هواية ناس لحد الان متفهمين ومقدرين للوضع العام يعني مو كلهم يثقلون كاهل الخاطب بالطلبات والشروط.
على العموم..
يجي الولد يخطب .... وتبدي قصة المتقدم والمتأخر والنيشان والمناقشات الي متخلص بين العائلة لان مثلا اهل البنية رايدين متقدم ومتأخر بالنسبة الهم قد يكون مقنع لكن بالنسبة لاهل الولد ممكن يكون هذا الرقم هواية ومرات على العكس ...المهم .... الي واكع بالنص هو الولد والبنية اذا همة يريدون بعضهم ويتمنون كلشي يخلص بسرعة حتى بفضل وتوفيق رب العالمين يبدون حياتهم ويكونون اسرة ويبدون يشقون طريقهم سوية بالحياة.....

خلي نكول الحمد لله رب العالمين والامور تسهلت واتفقوا على المتقدم والمتأخر والنيشان وسووا حفلة خطوبة وهاي همينة علّة بوحدها ..... الحاصل..... انخطبوا وهيييييييييييييييييييي وفرحانين........ لهنا حلو مو ؟؟.... حلو....لفترة... ربما .

ويروح اول اسبوع ورة الخطوبة ينقضي حلو حلو وكلش فرحانين ويجي الاسبوع الثاني والثالث واول شهر والشهر الثاني ......

هنا تبدي الاسئلة ...... الكل تسأل ها شوكت رح تتزوجون ؟؟؟ ويجي الجواب : بعد
يابة ليش بعد؟ ويجي الجواب ..... ها مو بعدنا ما لكينة سكن ..........!

وهنا تبدي رحلة البحث عن سكن .... الخطيبين ما عدهم مشكلة اول فترة لان متحمسين و واثقين انه رح يلكون فد شي .... أي شي ممكن يفيد عادي لان همة بس نفرين .. راسه وراس زوجته.... لكن يتفاجأون بالوضع.....................
ماكو شي للايجار .... لاحظوا انه اني كتبت كلمة (شي) وما كتبت بيت.... اعتقد تعرفون السبب مو ؟؟؟ لو مومو ؟ المهم .... لمن لا يدري وتلك مصيبةٌ رح اكللكم السبب.............

ماكو شي للايجار لان بالبداية يكونون مخططين ياخذون فد بيت زين ومرتب حتى يبدون حياتهم ورة فترة من ميلكون، شوية رح يتنازلون عن بعض المواصفات بالبيت ويبدون يدورون حتى لو مشتمل او ملحق... وراها من ميلكون رح يتنازلون بعد ويبدون يدورون حتى لو على شقة لو بيت طابق ثاني لو أي (شي) المهم يلكون سكن لان فترة الانتظار طولت والعائلة بدوا يسألون هواية ويحجون على شوية هِمّة وعلى لازم متصيرون باردين ولازم تتحركون وتدورون اكثر ........

على العموم اني مدا اكول انه الكل هيجي، لان اكو ناس دتلكي سكن ومرات حتى حسب ما يريدون من مواصفات لكن امكانية الحصول على هيجي شي تحولت من شي متاح للجميع عن طريق بعض البحث الى شي يعتمد على الحظ والفرص وسرعة القفز على أي شي يسنح ...... يعني لو يسمعون اكو بيت بالمريخ لازم يركضون عليه وبدون تفكير ومثل ما يكول المثل : تصرف وبعدين فكر لان يجوز يطير البيت بلحظة ..... هههههههههههههههههههه ... صدك شر البلية ما يضحك.

الله يكون بعوننا والله ..... اني صح لحد الان ما مريت بهيجي مواقف ..... لكن دا اعايشها واشوفها كل يوم وية الاصدقاء والاقارب ....

يابة اني هسة اترخص ..... بس اتمنى اشوف تعليقاتكم لان مشتاقلكم هواية وصارلي سنين مكاتب بوست جديد ... حييييييييل أي والله من العام مكتبت شي .. على العموم اني متأكد انتوا عاذريني لان الوضع مثل متعرفون ......سامحوني على التأخير وان شاء الله رح ارجع اتواصل وياكم قدر الامكان ......

يلله ، تصبحون على خير والله يحفظكم جميعا يا رب

بايزززز...................

حجي يودا الاعزب العجووووزز

17 comments:

Michomeme said...

اي والله ياحجي يودا الايجارات غالية واصلا ماكو شي للايجار

ما ادري الشباب الي مثل حلاتنا شراح يسوون، بس الله بعوننا


يوم الك تخطب وتدخل بمرحلة البحث عن البيت، ولو بيت اهلك جبير و مو ازدحام احجزلك الطابق الفوك من هسة


هههههه

اهلا بيك بالبلوك مرة ثانية

Yoda said...

هلووووووووووو اختي ميشو ،

مشتاقين، لايون كنك شلونه......

شنو القصة، خير؟ شكلكم ملاكين سكن ليهسة ؟؟؟ ها؟كوليلي يجوز اكدر اساعد

LionKing said...

مستحيل .. انت نطقت وكتبت عن لسان حالي ... شلونك اخوية الغالي .. اني بالفعل استلطفك جدا واتفاعل وية الكلام اللي تكبة .. وكلمة استلطاف ترة مابيها تعالي اخاف تاخذها بمعنى ثاني .. طبعا كلش عجبني الموضوع مالتك لان هوة لسان حال هواية من الشباب اللي يدورون على بيت للاستقرار ام اللي عندة مجال ابيتة ف اني اشد على ايدة واكلة توكل ورتب حالك بالبيت وياريتني كنت منهم ...

بالفعل ماكو (شي) للايجار !! وحيرة وفارق بالاسعار والمناطق .. تدري بية اتصور اني صارلي سنة كاطع مهر وقبل كم شهر بدة العد التنازلي بان استقر على بيت أأجر أي (شي) بعد ماكانت النا احلام طويلة عريضة بس وديناها لاحلام للخياط وكصفها وخصم منها وسواها مال هذا الوكت !!
تحياتي الك يودا .. والله يحفظك ..
صدك كل عام وانت بالف خير وعيد سعيد عليك ويوم زواجك ونفرح بيك وادرولك بيت ...
تحياتي ..

Yoda said...

لك هذا منوووو.... لك عيني عاش من شافك ..... اني كلت بعد ماكو ....مشتاقلك والله... وبالي يمك....كل عام وانتة بخير اولا وكذلك اختي ميشو.
تدري البارحة انتة جيت على بالي... والله العظيم مو مجاملة ولا كلام هيجي... من صدك جيت على بالي...البارحة عرس صديقي... زفيناه وخلصنه منه... والله من خلصت الزفو انتة جيت على بالي كلت لنفسي صدك، ابو اللول اشو ماكو منه لا حس ولا خبر... صارلهم هواية من انخطبوا ... ويا سبحان الله اليوم انت دزيت كومنت .... عيني ...مو سهل الواحد يثق بشخص من الانترنت ... اذا الكة (شي) اكلك ؟؟؟؟
لان صار كم مرة اسمع اكو (اشياء للايجار)يمنة ههههههه.

يجوز يفيدكم فد (شي) منهن... تدري... هاي اول مرة اكولها... اني ابد ما شايفك ولا حاجي وياك ما عدا بالمدونة.. بس احسك مو غريب علية... بين قوسين ارتاحيتلك يعني لتقوي علاقتك هههههههههههههه

اهوووو... هم دا احجي هواية ....... عيني ... ردلي جواب بسرعة يجوز يطلع بيهة خير؟؟؟؟ والله يقدم الي بي الخير والصالح .

اكلك عود جاوبني مو تختفي مثل كل مرة هههههههه..


تحياتي الك ولاختي العزيزة وكيب مي انفورمد.


يودا

Yoda said...
This comment has been removed by the author.
Yoda said...

hi againe

meowmom said...

I have no idea what you're saying but the arabic script looks so very graceful; I like to look at it.

peace,
mm

Michomeme said...

we are waiting for the new post

David said...

Hi Yoda, thanks for visiting my blog and your nice comment about my pictures. :)

So, how about a new post in English so I can read about how you are doing? ;)

So, you are a fan of NASA? Me too! :) I have always enjoyed following news about space exploration. I took some astronomy classes in college and learned a lot of interesting things about stars and our solar system.

LionKing said...
This comment has been removed by a blog administrator.
Yoda said...

لايونكنك....ان شاء الله ثقتك وثقتي بمحلها...ورح امسح هذا الربيلاي ان شاء الله

ان شاء الله نتكلم قريبا

اخوك

Yoda said...

لايونكنك..... اشو ماكو ... اخوك منتظرك ..... فلا تختفي صديقي ... ان شاء الله تكون بخير ..

حجي يودا ...

Michomeme said...

ok a new post is required

Michomeme said...

there is something called a new post, do you know that? :)

Yoda said...

Hello dear sister Micho,

well, I know I was too lazy lately in posting and everything, but I am in the middle of a chaos, new job you know, need time to adapt and all, applying to MA studies and preparing for my engineering qualification exam soon, so I am running like the comic hero(The Flash) just to do everything in time.....

:( poor me ...... naaa hahaha i'll make it, I always do..

oh and by the way, with all of the above, I tried to cut some of my time to search for a house for a friend, but when I found one, he doesn't want it... LoL :D

Well, I did what I have to do for a friend and he is like a brother to me so he deserve time and effort.....

oh... the above talking is enough to make a new post moooo...

هههههههههههههههه لو كاتب بوست جديد مو جان احسنلي ؟؟؟ هههه

I wish you all the best dear sister to you and to LionKing..

Inshallah I try to cut some time to write something ..

Yodaaaa was here ....

Sandybelle said...

عيني , يابه, نريد بوست جديد , يعني صدك لو كالوا بالسنه حسنه, زين سويه حسنتين؟ او 3 حسنات؟ حرام يعني؟؟ عيني , بوست جديد يابه

البرجوازي العراقي said...

يابة البلوك مالتك زين وحرامات تقلل الاكتفتي مالته هيجي

يعني لازم بوست كل شهر عل اقل والا الناس تفلت يعني اني بالصدفة طبيت شفت خوش قابلية خوش حجي حرامات تعوف البوستنك ...

على كولتك بايزززززززز

مع السلامةزززززززززز

البرجوازي العراقي
http://www.birjwazi.blogspot.com/